713.
आपुले गावीचे न देखेसे जाले । परदेसी एकले किती कंठू ॥१॥
म्हणऊनि पाहे मूळ येता वाटे । जीवलग भेटे कोणी तरी ॥धृपद॥
पाहाता अवघ्या दिसतील दिशा । सकळ ही वोसा दृष्टीपुढे ॥२॥
तुका म्हणे कोणी न सांगे वारता । तुझी वाटे चिंता पांडुरंगा ॥३॥

अर्थ :
या प्रदेशात (पृथ्वीवर) आपल्या गावाचे (पंढरी क्षेत्रातील वैष्णव) कोणीही मला न दिसेसे झाले, त्यामुळे मी या प्रदेशात एकट्याने किती दिवस काढू ? देवा मला तुमचे प्रेमाचे बोलावणे केंव्हा येईल असे झाले आहे. येथे कोणी तरी प्रेमाचा जिवलग भेटेल अशी आशा आहे. मी आता पाहले आहे की, या साऱ्यादिशा ओस पडल्या आहे. तुकाराम महाराज म्हणतात हे पांडुरंगा मला तुझी वार्ता कोणीही सांगत नाही त्यामुळे मला तुझी चिंता वाटत आहे.