27.
विश्रांतीचे स्थान संतांचे माहेर । ते या भूमीवर अलंकापुर ॥१॥
तये स्थळी माझा जीवाचा वो ठेवा । नमीन ज्ञानदेवा जाऊनिया ॥२॥
सिद्धेश्वर स्थान दरुशने मुक्ति । ब्रम्हज्ञान प्राप्ति वटेश्वर ॥३॥
चौऱ्यांशी सिद्धांचा सिद्धबेटी मेळा । प्रत्यक्ष स्थापिला कल्पवृक्ष ॥४॥
तयासी नित्यता घडता प्रदक्षणा । नाही पार पुण्या वास स्वर्गी ॥५॥
अमृतमय वाहे पुढे इंद्रायणी । भागीरथी आदिकरुनी तीर्थराज ॥६॥
ऐशिया स्थळी समाधि ज्ञानदेव । एका जनार्दनी ठाव अलंकापुर ॥७॥