711.
संसार तो कोण लेखे । आम्हा सखे हरीजन ॥१॥
काळ ब्रह्मानंदे सरे । आवडी उरे संचली ॥धृपद॥
स्वप्नी ते ही नाही चिंता । रात्री जाता दिवस ॥२॥
तुका म्हणे ब्रम्हरसे । होय सरिसे भोजन ॥३॥

अर्थ :
आम्हाला हरिजना सारखे सखे आहेत, म्हणून संसाराकडे कोण लक्ष देतो ? आमचा संपूर्ण काळ हा ब्रम्हानंदात जात आहे, त्यामुळे आमच्या हृदयात हरी भक्तीची आवड पूर्ण पणे भरली आहे. स्वप्नातही आम्हाला कसल्याही प्रकारची चिंता नाही. रात्रंदिवस आम्ही सुखी समाधानी आहो. तुकाराम महाराज म्हणतात या हरी भक्तांच्या संगतीने आम्हाला ब्रम्हा रसाचे भोजन दररोज मिळत आहे.