710.
कोठे भोग उरला आता । आठविता तुज मज ॥१॥
आड काही नये दुजे । फळ बीजे आणिले ॥धृपद॥
उद्वेग ते वायाविण । कैचा सीण चिंतने ॥२॥
तुका म्हणे गेला भ्रम । तुमच्या धर्म पायाचा ॥३॥

अर्थ :
हे देवा तुझे स्मरण केल्यावर आता माझ्या प्रारब्धाचा भोग कोठे उरेल ? तुझ्या आणि माझ्या मध्ये आता काहीच येणार नाही कारण नामस्मरणाचे बीज चांगल्या प्रकारे फळास आले आहे. तुझ्या चिंतनाने मनातील सारा उद्वेग नाहीसा होऊन गेला. तुकाराम महाराज म्हणतात तुमच्या पावन चरणाने माझा सारा भ्रम नाहीसा झाला आहे.