1988.
नाही आम्हा शत्रु सोईरे पिशुन । दाटले हे घन माहियेर ॥१॥
पाहे तेथे पांडुरंग रखुमाई । सत्यभामा राही जननिया ॥धृपद॥
लाज भय काही आम्हा चिंता नाही । सर्वसुखे पायी वोळगती ॥२॥
तुका म्हणे आह्मी सदैवाची बाळे । जालो लडिवाळे सकळांची ॥३॥

अर्थ :
आम्हाला कोणत्याही प्रकारचे शत्रू, सोयरे, उच, नीच असे दिसत नाही तर सर्वत्र आम्हाला आमचे माहेर पंढरी दाटलेली आहे असे दिसत आहे. मला सर्वत्र पांडुरंग रुखुमाई सत्यभामा हेच माता-पिता दिसत आहेत. आम्हाला कोणत्याही प्रकारची लाज भय चिंता नाही सर्व सुखे आमच्या पायापाशी लोळण घेतात. तुकाराम महाराज म्हणतात आम्ही श्रीमंताची बाळे झाले आहोत व त्यामुळे सर्वाचे लाडके झाले आहोत.