2369.
सुखरूप ऐसे कोण दुजे सांगा । माझ्या पांडुरंगा सारिखेंते ॥१॥
न लगे हिंडणे मुंडणे ते काही । साधनाची नाही आटाआटी ॥धृपद॥
चंद्रभागे स्नान विध तो हरीकथा । समाधान चित्ता सर्वकाळ ॥२॥
तुका म्हणे काला वैकुंठी दुर्लभ । विशेष तो लाभ संतसंग ॥३॥

अर्थ :
माझ्या पांडुरंगा सारखे सुखरूप या जगामध्ये दुसरे कोण आहे ते सांगा? पंढरीला सोडून इतर कोठेही जाण्याची गरज नाही हिंडण्याची गरज नाही आणि पंढरीत गेल्यावर मुंडण करण्याची गरज नाही व इतर साधना करण्याची आवश्यकता नाही. पंढरीत गेल्यानंतर चंद्रभागेचे स्नान करावे व हरिकथा ऐकावी हाच विधी आहे व त्याने सदासर्वकाळ चित्ताला समाधान मिळते. तुकाराम महाराज म्हणतात पंढरीमध्ये हरिनामाचा व जीव ब्रम्‍ह ऐक्याचा अवैध रुप काला आहे व हा लाभ वैकुंठाचे देखील दुर्लभ आसून हा विशेष लाभ संत संगतीने प्राप्त होतो.