646.
नामाचा महिमा नेणेचि पै ब्रह्मा | म्हणोनिया कर्मा अनुसरला ॥१॥
नाम हेचि कर्म नाम हेचि धर्म | केशव हेचि वर्म सांगितले ॥२॥
नाम शुद्ध स्नान नाम शुद्ध संध्या | नामाविणे वेद आणिक नाही ॥३॥
करिता आचमन केशव नारायण | करिती उच्चारण आधी हेचि ॥४॥
लग्नाचिये काळी म्हणती सावधान | लक्ष्मी नारायण चिंतन आधी ॥५॥
देहाचिये अंती प्रायश्चित्त देती | शेवटी वदविती रामनाम ॥६॥
ऐसिया नामापरते नाही सार | गिरिजेसी शंकर उपदेशी ॥७॥
करिती पितृश्राद्ध कर्म आचरती | शेवटी म्हणती एको विष्णु ॥८॥
नामे होय गति नामे होय मुक्ति | नामयाचे चित्ती रामनाम ॥९॥