1186.
पापाची मी राशी । सेवाचोर पायापाशी ॥१॥
करा दंड नारायणा । माझ्या मनाची खंडणा ॥धृपद॥
जना हाती सेवा । घेतो लडपणे देवा ॥२॥
तुझा ना संसार । तुका दोहीकडे चोर ॥३॥

अर्थ :
देवा मी तर पापाची राशीच आहे तुझी सेवा करण्याची मी टाळाटाळ करीत होतो. मी सेवा चोर आहे पण असे असले तरी मी तुझ्या पायाजवळ येऊन बसलो आहे. याकरिता देवा तुम्ही मला दंड करा. मला जो पदोपदी मान मिळत आहे त्याची तुम्ही खंडांना करा. देवा मी इतका पापी आहे की मी लोकांकडून माझी सेवा करून घेत आहे. तुकाराम महाराज म्हणतात या कारणामुळेच देवा मी धड तुझाही झालो नाही आणि संसाराचा ही झालो नाही दोन्हीकडेही मी चोर झालो आहे.