1973.
भाविका हे वर्म सापडले निके । सेविती कवतुके धणीवरी ॥१॥
इच्छितील तैसा नाचे त्यांचे छंदे । वंदितील पदे सकुमारे ॥धृपद॥
विसरले मुक्ती भक्तीच्या अभिळासे । ओढत सरिसे सुख आले ॥२॥
तुका म्हणे नाही मागायाची आस । पांडुरंग त्यास विसंबेना ॥३॥

अर्थ :
खऱ्या भाविक भक्तांना हरी प्राप्ती कशाने होते तर भक्तीने होते हे चांगले वर्म सापडले आहे आणि हरीभक्तीरस तृप्ती होई पर्यंत ते सेवन करतात. भक्त जशी इच्छा करतील त्या छंदात हा हरी नाचत असतो आणि भक्तिभावाने भक्त देखील हरीच्या सुकुमार चरणांना वंदन करतात. खरे जे भाविक भक्त आहेत ते भक्तीच्या अभिलासे मुळे मुक्तीला देखील विसरून जातात त्याच कारणामुळे सर्व सुख त्यांच्या जवळ आपोआप येतात. तुकाराम महाराज म्हणतात ज्या भाविकाला काहीच मागायची इच्छा नसते त्या भाविकाला पांडुरंग कधीही विसरत नाही.