1759.
निर्गुण गुणासी आले | परब्रह्म ठसविले |भक्त पुंडलिका लाधले | गौप्य केले प्रगट ॥१॥
सेवा सेवा ब्रह्मरस | विठ्ठल पंढरीनिवास ॥ धृ० ॥
निर्गुण गुणाकार | मूर्ति सांवळी सुंदर |सकलहि गुणांचे माहेर | मुक्तिपेठ पंढरी ॥२॥
धन्य धन्य भीमातट | चंद्रभागा हे निकट |जेथे विठ्ठलवीर प्रगट | नाम गर्जती हरिदास ॥३॥
धन्य धन्य पद्माळे | सभराभरित आनंद जळे |स्नान केलिया निर्मळे | कोटि कुळे उद्धरती ॥४॥
धन्य धन्य 'माणदेश | विठ्ठले केला रहिवास |नामा म्हणे विष्णुदास | देई उल्हास भक्तीचा ॥५॥