994.
नाशीवंत देह नासेल हा जाणा । का रे उच्चाराना वाचे नाम ॥१॥
नामेचि तारिले कोटयान हे कोटी । नामे हे वैकुंठी बैसविले ॥धृपद॥
नामापरते सार नाही त्रिभुवनी । ते का तुम्ही मनी आठवाना ॥२॥
तुका म्हणे नाम वेदांसी आगळे । ते दिले गोपाळे फुकासाठी ॥३॥

अर्थ :
हे लोकांनो आहो हा देह नाशिवंत आहे हे ओळखून तुम्ही मुखाने हरीनाम का घेत नाही ? नामामुळे आज पर्यंत अनेक कोट्यावधी लोक तरले गेले आहे या नामामुळे कित्येक लोकांना वैकुंठ प्राप्त झाले आहे. या त्रिभुवनात नामासारखे सार काश्यातही नाही हे तुम्ही मनात का आठवत नाही ? तुकाराम महाराज म्हणतात नाम हे वेद पेक्षा आगळे आहे ते या गोपालाने आपल्याला फुकट दिले आहे.