669.
आह्मी पतितांनी घालावे साकडे । तुम्हा लागे कोडे उगवणे ॥१॥
आचरता दोष न धरू सांभाळ । निवाड उकल तुम्हा हाती ॥धृपद॥
न घेता कवडी करावा कुढावा । पाचारिता देवा नामासाठी ॥२॥
दयासिंधु नाम पतितपावन । हे आम्हा वचन सापडले ॥३॥
तुका म्हणे करू अन्यायाच्या कोटी । कृपावंत पोटी तूम्ही देवा ॥४॥

अर्थ :
आम्ही पतीतांनी पातके करावे आणि तुम्ही पतितपावन आहात आणि आम्हाला तुम्ही संकटातून मुक्त करावे. आम्ही मर्‍यादा न ठेवता पापे वाढवितो, आणि तू त्यातून मुक्त करतोस. कधीही काहीच अपेक्षा न करता संकटात तू भक्तांचे रक्षण करतोस. तू दयासिंधु आहेस, पतितांना पावन करणारा आहेस हिच वचने आम्हाला अनेक ग्रंथातून सापडली आहेत. तुकाराम महाराज म्हणतात आम्ही कितीही अन्याय केले तरी तू कृपावंत आहेस आमचे दोष तू पोटात घेतोस.