1870.
पायाच्या प्रसादे । काही बोलिलो विनोदे ॥१॥
मज क्षमा करणे संती । नव्हे अंगभूत युक्ती ॥धृपद॥
नव्हे हा उपदेश । तुमचे बडबडिलो शेष ॥२॥
तुमचे कृपेचे पोसणे । जन्मोजन्मी तुका म्हणे ॥३॥

अर्थ :
संत हो, तुमच्या पायाच्या कृपेने मी जे काही लडिवाळपणाने बोललो आहे ; याबद्दल तुम्ही संतांनी मला क्षमा करावी. मी जे काही बोललो, त्यात माझ्या अंगचा शहाणपणा नाही, तर तो तुमचा आहे. हा माझा उपदेश नसून तुमच्यापासून जे काही ऐकिले ; तेच उच्छिष्ट शब्द मी कसेतरी बडबडलो आहे. तुकाराम महाराज म्हणतात, संतहो, मी जन्मोजन्मी तुमच्या कृपेचे पोसले जाणारे मूल आहे.