104.
सर्वत्र समान भावयुक्त पूर्ण ।
धृति धारणा धन वर्ते जया ॥
सामान्यत्व हरि समसेज करी ।
चित्त वित्त घरी हरिपाठे ॥
आकार निराकारी त्रिपथ शेजारी ।
हरि भरोवरी घेतु विरूळा ॥
ज्ञानदेवाजिणे अवघे ज्ञान होणे ।
विज्ञानी राहाणे गुरुकृपा ॥

अर्थ :
सर्वत्र समान व भावयुक्त राहुन जर नाम घेतले तर धर्माचे धारण होते व नामधनाचा वर्षाव होतो. ह्या हरिपाठामुळे हरि सामान्य होऊन त्याच्या बरोबर सम सेज करतो म्हणजे जागृत अवस्थेत तसेच झोपेतही बरोबर राहतो व त्याचे चित्त व वित्त सगळेच हरिरुपाला प्राप्त होते. निराकारातील त्रिगुण व मायेतील जगताचा आकार ह्यांना बाजुला सारुन हरिनामात रतणारा विरळाच असतो. असे हे ज्ञान प्राप्त झाले की सहज संसाररुपी विज्ञानात राहण्याची बाधा गुरुकृपेने दुर होते असे माऊली सांगतात.