276.
व्यक्ताचे अव्यक्ती पाहाता पै न दिसे ।
आपींआप रसे व्यक्त हरि ।
बाहेजु भीतरी आदिमध्य उर्ध्व ।
हृदयी सन्निध बिंबलासे ॥
ऐसीये दशे ते अव्यक्त भुंजसी ।
मी माझ्या मोहासी सांडी रया ।
बापरखुमादेविवर व्यक्त व्यक्ती अव्यक्त ।
अवघे संचित हरि आहे ॥

अर्थ :
विचार दृष्टीने पाहिले असता अव्यक्त परमात्म्याच्या ठिकाणी नामरुपात व्यक्त जगत दिसत नाही. तसे पाहिले तर जगत, अधिष्ठान दृष्टीने परमात्मा आहे. तो हरि आत बाहेर, आदि, मध्य आणि हृदयांत व्यापक रूपाने आहे. व आभास रूपाने हरिच आहे. अशा अव्यक्त हरिला प्राप्त हो. आणि मी व माझे अशा मोहाचा त्याग कर. व्यक्त, अव्यक्त, व्यक्ति, संचित हे सर्व माझे पिता व रखुमाईचे पती श्रीविठ्ठल तद्रुपच आहे. असे माऊली सांगतात.