1615.
नाही म्या वंचिला मंत्र कोणापाशी । राहिलो जीवासी धरूनि तो ॥१॥
विटेवरी भावे ठेवियेले मन । पाउले समान चिंतीतसे ॥धृपद॥
पावविला पार धरिला विश्वास । घालूनिया कास बळकट ॥२॥
तुका म्हणे मागे पावले उद्धार । तिही हा आधार ठेविलासे ॥३॥

अर्थ :
मला जो मंत्र माहित आहे तो मंत्र मी सर्वाना सांगितला आहे आणि कोणालाही मी त्या मंत्रापासून वंचित ठेवले नाही. आणि तोच मंत्र मी माझ्या जीवाशी घट्ट धरून ठेवला आहे. विटेवर असलेल्या समचरणाच्या ठिकाणीच मी माझा भक्तिभाव ठेवला आहे व त्याच ठिकाणी माझी दृढ भक्ती, विश्वास ठेवून मी माझी कंबर कसली त्यामुळे मी संसारातून पार पडलो. तुकाराम महाराज म्हणतात पूर्वी जे भक्त उद्धार पावले त्या भक्तांनी हा मार्ग मोकळा करून ठेवला आहे.