2148.
आता मज देवा । इचे हातीचे सोडवा ॥१॥
पाठी लागलीसे लांसी । इच्छा जिते जैसी तैसी ॥धृपद॥
फेडा आता पाग । अंगी लपवुनी अंग ॥२॥
दुजे नेणे तुका । काही तुह्मासी ठाउका ॥३॥

अर्थ :
देवा मला आता या इच्छेच्या हातून सोडवा. ही इच्छा माझ्या पाठीशी लागली आहे तिचे किती लाड पुरवले होते, आयुष्य कितीही सरले तरी देखील इच्छा जशी आहे तशीच जिवंत राहते. देवा तुमच्या अंगात माझे अंग लपवून घ्या व माझे व तुमचे ऐक्य करा माझ्या आतील इच्छा नाहीशी करा. तुकाराम महाराज म्हणतात देवा मला तुमच्या वाचून दुसरे काहीही नको हे तुम्हाला ठाऊकच आहे.