1682.
नाही दिले कधी कठिण उत्तर । तरी का अंतर पडियेले ॥१॥
म्हणऊनि आता वियोग न साहे । लांचावले देहे संघष्टणे ॥धृपद॥
वेळोवेळा वाचे आठवितो नाम । अधिकचि प्रेम चढे घेता ॥२॥
तुका म्हणे पांडुरंगे जननिये । घेऊनि कडिये बुझाविले ॥३॥

अर्थ :
देवाला मी कधीही कठोर शब्दात बोललो नाही तरीही देवात आणि माझ्यात असे अंतर का पडले आहे ? माझ्या देहाला आता देवाचे आलिंगन केव्हा पडेल यासाठी मला तळमळ लागली आहे. देह त्याच्यासाठी लाचावला आहे त्यामुळे देवाचा वियोग मला सहन होत नाही. आणि वेळो वेळा हरीचे नाम माझ्या वाचनात येत आहे आणि जसजसे हरीचे नाम मी घेत आहेत तसतसे देवाविषयी माझे प्रेम वाढतच आहे. तुकाराम महाराज म्हणतात हे पांडुरंगे माझी आई तू मला तुझ्या कडेवर घे व माझी समजूत काढा.