2638.
दिला जीवभाव । तेव्हा सांडिला म्या ठाव ॥१॥
आता वर्ते तुझी सत्ता । येथे सकळ अनंता ॥धृपद॥
माझीया मरणे । तुम्ही बैसविले ठाणे ॥२॥
तुका म्हणे काही । मी हे माझे येथे नाही ॥३॥

अर्थ :
देवा ज्यावेळी मी माझा जीवभाव तुला अर्पण केला त्याच वेळी मी त्याचा आश्रय सोडून दिला आहे. त्यामुळे हे अनंता आता मी येथे या भवसागरामध्ये तुझ्या सत्तेनेच वर्तत आहे. देवा देहभावच माझा राहिला नाही त्यामुळे माझ्या देहभावाला मरण आले असून त्यामुळेच तर तुम्ही माझ्या अंत:करणामध्ये तुमचे ठाणे बसविले आहे. तुकाराम महाराज म्हणतात, त्यामुळेच हे देवा माझ्या ठिकाणी मी आणि माझे हे काहीच राहिले नाही.