2318.
विश्वंभरा वोळे । बहुत हात कान डोळे ॥१॥
जेथे असे तेथे देखे । मागितले ते आइके ॥धृपद॥
जे जे वाटे गोड । तैसे पुरवितो कोड ॥२॥
तुका म्हणे भेटी । काही पडो नेदी तुटी ॥३॥

अर्थ :
मी विश्वंभराला शरण गेलो कारण त्याला खूप हात पाय कान डोळे आहेत. मी व त्याचे सर्व भक्त जिथे कोठे असतील तेथे तो त्यांना पाहून त्यांचे सर्व म्हणणे ऐकतो. भक्तांच्या जे जे काही आवडीचे आहे त्यांना जे जे काही गोड वाटते त्यांचे सर्व लाड हा देव पूर्ण करतो. तुकाराम महाराज म्हणतात विश्वंभर सर्वत्र व्यापक आहे त्यामुळे मला त्याची भेट केंव्हा ही घडते आमच्या भेटीत कधीही अंतर पडत नाही.