3052.
जायाचे शरीर जाईंल क्षणांत । का हा गोपिनाथ पावेचि ना ॥१॥
तुम्ही संत सारे कृपेचे सागर । निरोप हा फार सांगा देवा ॥धृपद॥
अनाथ अज्ञान कोणी नाही त्याला । पायापे विठ्ठला ठेवी मज ॥२॥
तुका म्हणे ऐसी करा निरवण । मग तो रक्षण करिल माझे ॥३॥

अर्थ :
हे शरीर केव्हा तरी जाणारच आहे व ते क्षणात केव्हाही जाईल पण तरी देखील मला हा गोपीनाथ भेटत नाही ? हे संतजनहो तुम्ही सारेच कृपेचे सागर आहात त्यामुळे माझा निरोप देवाला तुम्ही आग्रह करुन सांगा. हा तुकाराम अनाथ आहे, अज्ञानी आहे याला येथे कोणीही नाही त्यामुळे हे विठ्ठला तुम्ही मला तुमच्या पायाजवळच ठेवा असा माझा निरोप तुम्ही विठ्ठलाला सांगा. तुकाराम महाराज म्हणतात, हे संतजनहो अशी सूचनाच तुम्ही त्या विठ्ठलाला करा मग तो माझे रक्षण करील.