449.
अंगाचिये सेज फणि छाया धरी | सहस्त्रमुखी करी स्तुति शेष ॥१॥
परि तयाते तुझे चरित्र अकल्पित | तेथे माझे गीत कोणीकडे ॥२॥
कैशापरी तुज आम्ही ध्यावे देवा | हे वर्म केशवा सांग मज ॥३॥
मार्कंडेयो भृशुंडी लोमहर्ष अगस्ति | करिता तुझी स्तुति कल्प गेले ॥४॥
ध्यानी पाहता तुज न पवती योगी | तेथे मी तो रोगी कोणीकडे ॥५॥
ब्रह्मचर्यव्रत आचरती देव | ऋषिमुनि सर्व करिती सेवा ॥६॥
परि तुवा गर्व हरिला तयांचा | तेथे माझी वाचा कोणीकडे ॥७॥
इतुके ऐकोनि बाल केशिराज खुणे | आरुता येई म्हणे नामयासी ॥८॥
मुखी माझे नाम हृदयी धरुनि प्रेम | हेंचि तुज वर्म सांगितले नाम्या ॥९॥