3363.
एका अयोध्ये अवतार । दुजा गोकुळीं निर्धार ॥१॥
एके ताटिका मारिली । एके पूतना शोषिली ॥२॥
एके अहिल्या उध्दरिली । एके कुब्जा पावन केली ॥३॥
एका एकपत्नीव्रत । एक गोपीं ते भोगीत ॥४॥
एक हिंडे वनोवनी । एक हिंडे वृंदावनीं ॥५॥
एके रावण मर्दिला । एके शिशुपाळ वधिला ॥६॥
एके बिभिषणा पाळिले । एके अर्जुना सांभाळिले ॥७॥
एका वहनी हनुमंत । एका गरुड शोभत ॥८॥
एका शोभे धनुष्यबाण । एका काठी कांबळी संपूर्ण ॥९॥
ऎसा भक्तांचा कळवळा । एका जनार्दनी बोधिला ॥१०॥