592.
माझी पूजा हेचि अर्चन ।
तुमचे नामसंकीर्तन ।
नेणे करु वेदाध्ययन ।
नेणे आसन योगाचे ॥१॥
म्हणोनि येतो काकुलती ।
अत्यंत मूढ आहे माझी मती ।
नेणे करु तुमची स्तुती ।
अहो जगत्पती पुराणपुरुषा ॥२॥
कैसे होईल ते मी नेणे ।
भूत भविष्य वर्तमाने ।
अल्पबुध्दी माझे जिणे ।
मूढपणे वर्तणूक ॥३॥
यालागी तुमचे धरिले नाम ।
तुमचे स्तवनी ठेविले प्रेम ।
न कळे आणिक न चले नेम ।
साधन दुर्गम मज वाटे ॥४॥
नेणे तीर्था पलाटण ।
नेणे मंत्राचे पुरश्चरण ।
नेणे योगयाग सांख्यज्ञान ।
नेणे करु ध्यान तुमची पूजा ॥५॥
नेणे कैसी माझी करुणा ।
येईल तुम्हा नारायणा ।
नेणे वर्णू तुमच्या गुणा ।
नेणे धारणा व्रतनिष्ठा ॥६॥
नाही वाचासंस्कार ।
नाही घोकिले जी अक्षर ।
नेणे करु यज्ञाचार ।
स्वधर्म तोहि विधियुक्त ॥७॥
निळा म्हणे सर्वापरी ।
आहे मूर्ख मी श्रीहरी ।
ताराल ऐसिया नवल तरी ।
तुमची थोरी प्रगटेल ॥८॥