3885.
(बाळक्रीडा अभंग)
ये दशे चरित्र केले नारायणे । रांगता गोधने राखिताहे ॥१॥
हे सोंग सारिले या रूपे अनंते । पुढेहि बहुत करणे आहे ॥२॥
आहे तुका म्हणे धर्म संस्थापणे । केला नारायणे अवतार ॥३॥

अर्थ :
अशा प्रकारे कृष्णाने रांगत असल्यापासून ते गाई रक्षण करण्यापर्यंत विविध प्रकारचे चरित्र केले. नंतर देवाने गोपाळाचे सोंग देखील बाजूला सारले कारण देवालापुढे खूप मोठे मोठे काम करायचे होते. तुकाराम महाराज म्हणतात, खरे तर नारायणाने धर्मसंस्थापना करण्यासाठीच अवतार घेतलेला होता.