2058.
दुःखाचिये साठी तेथे मिळे सुख । अनाथाची भूक दैन्य जाय ॥१॥
उदाराचा राणा पंढरीस आहे । उभारोनि बाहे पालवितो ॥१॥
जाणतियाहूनि नेणत्याची गोडी । आळीगिया आवडी करूनिया ॥२॥
शीण घेऊनिया प्रेम देतो साटी । न विचारी तुटी लाभा काही ॥३॥
तुका म्हणे असो अनाथ दुबळी । आम्हासी तो पाळी पांडुरंग ॥४॥

अर्थ :
जे पंढरीला नेहमी येतात त्यांना दुखाच्या बदल्यात सुख प्राप्त होते आणि जे अनाथ आहेत त्यांची भूक आणि दैन्य हे नाहीसे होते. कारण उदाराचा राजा पंढरी मध्ये उभा आहे तो त्याचे दोन्ही हात पुढे करून भक्तांना आपल्याजवळ बोलून घेतो. जाणत्या भक्तापेक्षा नेणत्या भक्ताची जास्त गोडी या विठोबा रायाला आहे आणि त्याच भक्तांना तो आवडीने आलिंगन देतो. भक्तांचे शीण भाग घेऊन त्या बदल्यात त्यांना हा देव प्रेम देतो परंतु त्या बदल्यात आपल्याला काही लाभ होईल की नाही याविषयी लाभ होईल किंवा तोटा होईल याविषयी देव काहीच विचार करत नाही. तुकाराम महाराज म्हणतात आम्ही भले अनाथ असो दुबळे असो परंतु आमचे रक्षण पालन-पोषण तो पांडुरंग करतो.