2222.
हेचि दान देगा देवा । तुझा विसर न व्हावा ॥१॥
गुण गाईन आवडी । हेचि माझी सर्व जोडी ॥धृपद॥
न लगे मुक्ती आणि संपदा । संतसंग देई सदा ॥२॥
तुका म्हणे गर्भवासी । सुखे घालावे आह्मासी ॥३॥

अर्थ :
देवा मला जर दान द्यायचे असेल तर एकच दे की मला तुझा कधीही विसर होऊ नये. मग मी प्रेमाने तुझे आवडीने गुणगान गाईन आणि हाच माझा सर्व प्रकारचा लाभ आहे. देवा मला मुक्ती आणि संपदा काहीच नको पण मला संत संगती नेहमी घडू द्यावी. तुकाराम महाराज म्हणतात एवढे जर दान तु मला दिले देवा तर मला तु सुखाने मग गर्भवासात घाल त्याचे काहीच मला दुःख वाटणार नाही.