2431.
लागले भरते । ब्रह्मानंदाचे वरते ॥१॥
झाला हरीनामाचा तारा । सीड लागले फरारा ॥धृपद॥
बैसोनि सकळ । बाळ चालिले गोपाळ ॥२॥
तुका म्हणे वाट । बरवी सांपडली नीट ॥३॥

अर्थ :
हरिनामामुळे ब्रह्मानंदापेक्षाही आनंदाला भरती येत आहे. हा भवसागर तरुन जाण्याकरता हरिनाम रुपी जहाज तयार झाले असून त्या जहाजावर आनंदाचा फरारा असलेले शिड लागले आहे. त्या जहाजामध्ये सर्व बाळ गोपाळ बसलेले आहेत व ते देवाकडे चालले आहेत. तुकाराम महाराज म्हणतात हरीची प्राप्ती करून घेण्यासाठी हरी नामाची चांगलीच वाट सापडलेली आहे.