1222.
एका म्हणता भले । आणिका सहजचि निंदिले ॥१॥
काही न करिता सायास । सहज घडले ते दोष ॥धृपद॥
बरे वाईटाचे । नाही मज काही साचे ॥२॥
तुका म्हणे वाणी । खंडोनि राहावे चिंतनी ॥३॥

अर्थ :
एखाद्या व्यक्तीला बऱ्याच माणसांमध्ये चांगले म्हटले तर बाकीच्यांची निंदा सहजच घडते. या कृतीमध्ये कोणत्याही प्रकारचे कष्ट न करता दोष घडला जातो. कोणालाही बरे वाईट म्हणणे माझ्या ठिकाणी राहिलेच नाही त्यामुळे माझ्याकडून पापच घडत नाही. तुकाराम महाराज म्हणतात वाणीने कोणाचीही निंदा न करण्यासाठी मनावर नियंत्रण घालून सतत नामाचे चिंतन करत रहावे.