1223.
आणिले सेवटा । आता कामा नये फाटा ॥१॥
मज आपुलेसे म्हणा । उपरि या नारायणा ॥धृपद॥
वेचियेली वाणी । युक्ती अवघी चरणी ॥२॥
तुका धरी पाय । क्षमा करवूनि अन्याय ॥३॥

अर्थ :
देवा मी सेवेचा शेवट केला आहे त्यामुळे मला फलप्राप्ती करिता कोणताही फाटा तुम्ही येऊ देऊ नका. हे नारायणा तुम्ही मला हा तुकाराम माझा आहे असे म्हणून माझा अंगिकार करावा हेच फळ द्यावे. देवा मी माझी बुद्धी आणि वाणी दोन्ही तुमच्या चरणी समर्पित केली आहे. तुकाराम महाराज म्हणतात देवा मी माझ्या अन्यायाची अपराधाची तुमच्याकडून क्षमा करून घेऊन तुमचे पाय घट्ट धरले आहे.