2574.
एकवेळ करी या दुःखावेगळे । दुरिताचे जाळे उगवूनि ॥१॥
आठवीन पाय हा माझा नवस । रात्री ही दिवस पांडुरंगा ॥धृपद॥
बहु दूरवरी भोगविले भोगा । आता पांडुरंगा सोडवावे ॥२॥
तुका म्हणे काया करीन कुरवंडी । ओवाळूनि सांडी मस्तक हे ॥३॥

अर्थ :
देवा माझ्या पातकांचे जाळे एकदाचे तोडून टाका आणि मला या दुःखातून मुक्त करा. हे पांडुरंगा रात्रंदिवस तुझ्याच पायाचे मी चिंतन करील आणि हाच माझा नवस आहे. हे पांडुरंगा मी आज पर्यंत खूप दुःखाचे भोग भोगले आहेत आता तुम्ही मला यातून सोडवावे. तुकाराम महाराज म्हणतात हे देवा मी माझ्या शरीराची कुरवंडी करून तुझ्यावरून ओवाळून टाकीन माझे मस्तक देखील तुझ्या वरून ओवाळून टाकेल.