2345.
सर्वात्मकपण । माझे हिरोनि नेतो कोण ॥१॥
मनी भक्तीची आवडी । हेवा व्हावी ऐशी जोडी ॥धृपद॥
घेईन जन्मांतरे । हे चि करावया खरे ॥२॥
तुका म्हणे देवा । ॠणी करूनि ठेवू सेवा ॥३॥

अर्थ :
मी सर्वात्मक आहे, आत्मरूपाने सर्वत्र व्यापक आहे अशी माझी दृष्टी झाली आहे व ती माझ्यापासून कोण हिराऊन नेइल? असे असले तरीदेखील मला भक्तीचीच आवड आहे आणि भक्तीचाच लाभ मला व्हावा असे मला वाटत आहे. आणि हीच माझी इच्छा पूर्ण करण्यासाठी मी अनेक जन्म घेत राहील. तुकाराम महाराज म्हणतात मी प्रत्येक जन्मात देवाची सेवा करीन व त्याला माझा ऋणी करून ठेवीन.