2074.
मोहरोनी चित्ता । आणू हळू चि वरी हिता ॥१॥
तो हे पडती आघात । खोडी काढिती पंडित ॥धृपद॥
संवसारा भेणे । काही उसंती तो पेणे ॥२॥
एखादिया भावे । तुका म्हणे जवळी यावे ॥३॥

अर्थ :
आम्ही आमच्या चित्ताला ज्या मार्गावर आमचे स्वहित आहे तिकडे हळूहळू त्या मार्गाला आम्ही नेत आहोत. परंतु त्यातही पंडित लोक आम्हाला त्रास देतात, त्यातही ज्या मार्गाने आम्ही चाललोत त्या मार्गातही आमच्या चुका हे लोक काढतात व आम्ही ज्या मार्गाने चाललो आहोत त्या मार्ग विषयी आम्हाला संदेह निर्माण करतात. आम्हाला या संसाराविषयी भीती निर्माण होत आहे त्यामुळे आम्हाला काहीही करून हळूहळू का होईना परंतु आम्हाला आमच्या नीजस्वरूपाचा मुक्काम गाठायचा आहे. तुकाराम महाराज म्हणतात कोणत्याही भावनेने का होईना परंतु आम्ही देवाजवळ यावे.