354.
भवसिंधूचे काय कोडे । दावी वाट चाले पुढे ॥१॥
तारू भला पांडुरंग । पाय भिजो नेदी अंग ॥धृपद॥
मागे उतरिले बहुत । पैल तिरी साधुसंत ॥२॥
तुका म्हणे लाग वेगे । जाऊ तयाचिया मागे ॥३॥

अर्थ :
अरे जर स्वतः पांडुरंग परमात्माच आपल्याला या भवसागरातून तारण्यासाठी आपल्या पुढे चालत आहे मग तुला यापलीकडे जाण्यासाठी काय अवघड आहे ? हा पांडुरंग परमात्मा एक उत्कृष्ट नावाडी आहे तो तुला या भावासागारातील पाणी तुझ्या अंगालाच काय तर हात पाय यांनासुद्धा लावू देणार नाही थोडेदेखील पाणी तुझ्या हाता व पायांना लागणार नाही. यांच्या आधाराने तर पूर्वी अनेक साधुसंत हा भवसागर तरुन गेलेले आहेत. तुकाराम महाराज म्हणतात आपणही त्या पांडुरंगाच्या मागे तत्परतेने धावत जाऊ.