1216.
आपुलिया काजा । आह्मी सांडियेले लाजा ॥१॥
तुम्हा असो जागवीत । आपुलिया हित ॥धृपद॥
तुम्ही देहशून्य । आम्हा कळे पाप पुण्य ॥२॥
सांगायासी लोका । उरउरीत उरला तुका ॥३॥

अर्थ :
हे देवा आम्ही आमच्या उद्धाराच्या कामाकरिता लाज सोडून देत आहोत. देवा आम्ही तुला जागवीत आहोत कारण आमचे हित तुझ्या हातात आहे. देवा तुम्ही देह शून्य आहात, तुम्हाला देहच नाही, तुम्ही विदेही आहात त्यामुळे तुम्हाला पाप-पुण्य नाही पण मात्र आम्हाला पापपुण्य आहे आणि ते आमच्या अनुभवावरूनच आम्हाला समजते आणि कळून येते. तुकाराम महाराज म्हणतात मी ही तुमच्या प्रमाणे देह शून्य आहे विदेही आहे परंतु भुतला वरील अज्ञानी लोकांना उपदेश करण्यासाठी मी वेगळा होऊन राहतोय.