1646.
काय तुझे वेचे मज भेटी देता । वचन बोलता एक दोन ॥१॥
काय तुझे रूप घेतो मी चोरोनि । त्या भेणे लपोनि राहिलासी ॥धृपद॥
काय तुझे आम्हा करावे वैकुंठ । भेवो नको भेट आता मज ॥२॥
तुका म्हणे तुझी नलगे दसोडी । परि आहे आवडी दर्शनाची ॥३॥

अर्थ :
देवा तू मला भेट दिली आणि दोन शब्द माझ्याशी बोलला तर तुझे काही खर्च होणार आहे काय. मी तुझे रूप चोरून घेतो की काय या भीतीने तर तू लपून राहत नाहीस ना देवा ? आम्हाला माहित आहे कि तुझे राहण्याचे स्थान हे वैकुंठ आहे मग आम्ही तुला ते वैकुंठ मागू अशी भीती तुला वाटते आहे की काय देवा, आम्हाला तुझ्या वैकुंठाची काय करायचे आहे आम्हाला केवळ तुझी भेट व्हावी एवढेच. तुकाराम महाराज म्हणतात अरे देवा आम्हाला तुझ्याकडून शित भर दशी सुद्धा नको आम्हाला तुझ्या दर्शनाची आवड आहे आम्हाला तू दर्शन द्यावे म्हणजे झाले.