303.
सुवर्णाचा शोभे मस्तकी मुगुट | हिरे घनदाट तयावरी ॥१॥
विस्तीर्ण कपाळ व्यंकटा भूकुटी | टिळक लल्लाटी केशराचा ॥२॥
कमळाकार नेत्र आकर्ण शोभती | कुंडले झळकती कर्णी ज्याच्या ॥३॥
सरळ नासिक आरक्त अधर | हनुवटी सुंदर राघवाची ॥४॥
कंठाचा आकार कंबुग्रीवा ऐसा | हृदयावरी ठसा द्विजपद ॥५॥
सुकुमार सुरेख जयाचे उदर | ब्रह्मांडे अपार वसती जेथे ॥६॥
नाभी कमळींचा ब्रह्मा नेणे अंत | कडदोरा शोभत कटी ज्याच्या ॥७॥
दंडी पेट्या करी जडित मुद्रिका | पिवळा नेटका पीतांबर ॥८॥
केशराची उटी सरळ बाहुदंड | चिमणा कोदंड हाती ज्याच्या ॥९॥
गर्जती नेपुरे कोमळ चरणी | वज्राकुश चिन्ही विराजित ॥१०॥
कौस्तुभ मुक्‍तमाळा रुळे वैजयंती | भ्रमर भुलती नामा म्हणे॥११॥