3045.
माझे मुख नामी रंगो सर्वकाळ । गोविंद गोपाळ राम कृष्ण ॥१॥
अबद्ध चांगले गाऊ भलतैसे । बाळ वडे जैसे मायबापा ॥२॥
तुका म्हणे मज न लवी वाकडे । मी तुझे बोबडे बाळ तान्हे ॥३॥

अर्थ :
माझे मुख नेहमीच सर्वकाळ राम कृष्ण गोविंद गोपाळ या नामात रंगो. लहान बाळ आई बापाजवळ कसेही वेडे वाकडे बोबडे बोल बोलते त्याप्रमाणे मी या हरीचे नाम शुध्द अबध्द चांगले जसे जमेल तसे गात आहे. तुकाराम महाराज म्हणतात, देवा तू मला वाकडयात लावू नकोस मी तुझ्याशी बोबडे बोलणारे तुझे तान्हे बाळ आहे.