3558.
(पंढरीस जाणाऱ्या वारकऱ्यांबरोबर देवास पत्र)
न बैससी खाली । सम उभाच पाउली ॥१॥
ऐसे जाले बहुत दिस । जाली युगे अठ्ठाविस ॥धृपद॥
नाही भाग सीण । अराणूक एक क्षण ॥२॥
तुका म्हणे किती । मापे केली देती घेती ॥३॥

अर्थ :
देवा तू कधीही खाली बसत नाही किती दिवस झाले तसा दोन्हीही समचरण ठेवून तू विटेवर तसाच उभा आहेस. देवा तू विटेवर तुझे दोन्हीही समचरण ठेवून उभा राहून कितीतरी दिवस म्हणजे अठ्ठावीस युग झाले आहेत. देवा असे असले तरी देखील तुला काही त्रास शीण होत नाही एक क्षण देखील तू आराम करत नाहीस. तुकाराम महाराज म्हणतात, देवा तू कितीतरी वेळा भक्तांजवळ देण्याघेण्याचे माप केले आहेस त्याला काही गणती नाही व आम्हालाही काही कळत नाही.