2231.
चालिला देवाचे भेटीला सन्मुख । ब्राम्हणाचा हरिख न समाये ॥१॥
पाहाता लोचनी राजीवलोचन । भावाचे मोचन तेचि काळी ॥२॥
सभा ते साजिरी रत्न सिंहासनी । देव चुडामणी शोभतसे ॥३॥
राईरखुमाई चामरे ढाळिती । राधा उभी हाती घेउनी छत्र ॥४॥
समारंभे पुढे गरुड तो उभा । शोभतसे शोभा दिव्य कांही ॥५॥
यादवांची सभा दाटलीसे भारी । नाना उपचारी रिद्धी सिद्धी ॥६॥
उद्धव अक्रूर उभे पायांपासी । देवादिदेवासी विडे देत ॥७॥
नामदेव तेथे उभा होता निका । घेऊनि पादुका दोन्ही हाती ॥८॥