3219.
परि आता माझी परिसावी विनंती । रखुमाईच्यापती पांडुरंगा ॥१॥
चुकलिया बाळा न मारावे जीवे । हित ते करावे मायबापी ॥२॥
तुका म्हणे तुझा म्हणताती मज । आता आहे लाज हेचि तुम्हा ॥३॥

अर्थ :
हे रुक्मीणीच्या पती पाडूरंगा माझी एक विनंती तुम्ही ऐकाच. आपले लेकरु लहान बाळ जर चुकले तर त्याला मायबापाने जीवेच मारु नये तर त्याचे हित होईल असेच त्यांनी करावे. तुकाराम महाराज म्हणतात, देवा लोक म्हणतात की, मी तुमचा आहे मग याचीच लाज तुम्हाला असू दयावी.