226.
ध्याइन तुझे रूप गाइन तुझे नाम । आन न करी काम जिव्हामुखे ॥१॥
पाहिन तुझे पाय ठेविन तेथे मी डोई । पृथक ते काही न करी आन ॥धृपद॥
तुझेचि गुणवाद आइकेन कानी । आणिकाची वाणी पुरे आता ॥२॥
करिन सेवा करी चालेन मी पायी । आणीक न वजे ठायी तुजविण ॥३॥
तुका म्हणे जीव ठेवीन मी पायी । आणीक ते काई देऊ कवणा ॥४॥

अर्थ :
देवा मी तुझेच रूप ध्यानी ठेवीन तुझेच नाम गाईन आणि दुसरे कोणतेही काम माझी जीभ करणार नाही. हे देवा मी माझ्या डोळ्याने तुझेच पाय चरण पाहीन व माझे मस्तक त्या ठिकाणी ठेवीन त्याशिवाय दुसरे काही करणार नाही. तुझेच गुणगान मी गाईन व व्यर्थ बडबड पुरे आता. मी पायी चलत येऊन तुझीच सेवा करीन व तुला सोडून दुसरे कोठेही मी जाणार नाही. तुकाराम महाराज म्हणतात मी माझा जीव तुझ्या पायी ठेवीन आणि आता कोणालाही काही देण्या साठी माझ्या कडे काय आहे.