7.
पुंडलिक पेठ वैष्णवांचा हाट । करिती बोभाट हरिनामाचा ॥१॥
वोळले अंबर अमृत तुषार । झेलित अमर चकोर झाले ॥२॥
देव मुनी सर्व ब्रह्मादिक लाठे । पंढरिये पेठे प्रेमपिसे ॥३॥
निवृत्ति निर्वाळला ज्ञानदेव सोपान । खेचर तल्लीन विनटला ॥४॥

अर्थ:
पुंडलिक सर्व संतांच्या मेळाव्यात पंढरीच्या पेठेत हरिनामाचा गजर करत आहेत चंद्राने केलेल्या अमृत वर्षावा मुळे जसे चकोर पक्षी अमर होतात तसे आकाशातुन ब्रह्म भक्तांवर अमृत वर्षाव करते. ब्रह्मादिक, ऋषी, मुनी पंढरी तील भक्तीचा गजर ऐकुन पीसे होतात. भक्तीपीसे त्यांना लागते. निवृत्तिनाथ म्हणतात त्यांच्या सकट ज्ञानेश्वर सोपान विसोबा खेचर भक्तीने विठ्ठल रुपात लीन झाले.