563.
कैवल्याच्या तुम्हा घरी । राशी हरी उदंडा ॥१॥
मजसाठी का जी वाणी । नव्हे धणी विभागा ॥धृपद॥
सर्वा गुणी सपुरता । ऐसा पिता असोनी ॥२॥
तुका म्हणे पांडुरंगा । जालो सांगा सन्मुख ॥३॥

अर्थ :
हरी, तुमच्या घरी मोक्षाच्या पुष्कळ राशी आहेत. मग माझ्या साठी त्या गोष्टीची उणीव का बरे आहे ? मला आनंदाचा वर का बरे मिळत नाहि ? तू सर्वगुण संपन्न पिता असून माझ्या बाबतीत अशी उणीव का ? तुकाराम महाराज म्हणतात देवा मी तुमच्या समोर माझे हृदय प्रकट केले आहे आता मला सर्व काही सांगा.