2466.
आम्हा सोइरे हरीजन । जनी भाग्य निकींचन ॥१॥
ज्याच्या धैर्‍या नाही भंग । भाव एकविध रंग ॥धृपद॥
भुक तहान चित्ती । सदा देव आठविती ॥२॥
तुका म्हणे धन । ज्याचे वित्त नारायण ॥३॥

अर्थ :
आमचे सोयरे हरिजन आहेत हरिभक्त आहेत की जे निकिंचन म्हणजे दरिद्री आहेत व दरिद्री असणे हेच ज्यांचे भाग्य आहे. ज्यांचे धैर्य कधी भंगत नाही आणि ज्याचा एकविध भक्ति भाव हरी विषयी असतो आणि त्याच्याच रंगात जे रंगलेले असतात. भूक तहान चिंता हे सर्व विसरून जे नेहमी देवालाच आठवत असतात. तुकाराम महाराज म्हणतात ज्यांचे धन निजस्वरूप नारायणच आहे.