1330.
आपुल्या आपण उगवा लिगाड । काय माझे जड करुन घ्याल ॥१॥
उद्धारासी काय उधाराचे काम । वाढवूंचि श्रम नये देवा ॥धृपद॥
करा आता मजसाठी वाड पोट । ठावे नाही तंटे झाले लोकी ॥२॥
तुका म्हणे बाकी झडलियावरी । न पडे वेव्हारी संचिताचे ॥३॥

अर्थ :
देवा तुम्ही या भवसागरातील उपाधी सोडवण्यासाठी काहीतरी करा, माझा उद्धार करण्याकरता माझ्या जडपणाशी, माझ्या मूर्खपणाशी काय काम ? देवा माझा उद्धार करण्यासाठी उधारीचे काय काम आहे, म्हणजे आज करतो उद्या करतो असे तुम्ही का करतात. असे करून तुम्ही माझे श्रम वाढवू नका. देवा आता तुम्ही तुमच्या पोटी माझ्याविषयी दया येऊ द्या. लोकांमध्ये माझी किती फजिती झाली आहे हे तुम्हाला माहित आहे, ही गोष्ट तुम्हाला माहित नाही काय ? तुकाराम महाराज म्हणतात देवा एकदा की माझ्या संचिताची बाकी भेटली ती पुन्हा मी कर्मच करणार नाही.