401.
गुरुपरंपरा आम्हा चैतन्य बळी ।
तयाच्या स्मरणे आम्ही वैकुंठी बळी ॥१॥
नमस्कार हा तया साष्टांग माझा ।
वोवाळू जीवे साधु चैतन्य-राजा ॥२॥
चैतन्य हा सर्वगत व्यापकि गुरू ।
प्रगटला हा तुकाराम वेष दातारू ॥३॥
तयाचे हे ध्यान सदा माझे अंतरी ।
अंतरीचे ध्यान सबाह्याभ्यांतरी ॥४॥
नेणे स्नान दान जप आसन मुद्रा ।
सदा सर्वकाळ ध्याऊ चैतन्य पदा ॥५॥
बहेणि म्हणे आम्ही मुक्त गुरूचे ध्याने ।
प्रेमे भक्ति-भावे तया वोवाळू प्राणे ॥६॥