834.
बहु उतावीळ भक्तीचिया काजा । होसी केशीराजा मायबापा ॥१॥
तुझ्या पायी मज जालासे विश्वास । म्हणोनिया आस मोकलिली ॥धृपद॥
ॠषि मुनि सिद्ध साधक अपार । कळला विचार त्यासी तुझा ॥२॥
नाही नास ते सुख दिले तयास । जाले जे उदास सर्वभावे ॥३॥
तुका म्हणे सुख न माये मानसी । धरिले जीवेसी पाय तुझे ॥४॥

अर्थ :
हे केशव राजा हे मायबापा तू भक्तांचे काम करण्यासाठी बहुउताविळच असतोस. तूझ्या पायी आता मला पूर्ण विश्वास आहे त्यामुळे मी सर्व आशा टाकून दिलेली आहे. ऋषीमुनी सिद्ध साधक असे अपार जन यांना तुझे स्वरूप समजले आहे. जे सर्व भावे देहाविषयी उदास झालेले त्यांना तू अपार असे सुख अविनाशी सुख दिलेले आहे. तुकाराम महाराज म्हणतात देवा त्या साधू संता प्रमाणे मी ही तुझे चरण आता माझ्या जीवाशी हृदयाशी घट्ट धरून राहिलो आहे त्यामुळे माझ्या मनामध्ये सुख मावेनसे झाले आहे.