1571.
येणे मार्गे गेले । त्याचे निसंतान केले ॥१॥
ऐसी अवघड वाट । कोणा सांगावा बोभाट ॥धृपद॥
नागविल्या थाटी । उरो नेदीच लंगोटी ॥२॥
तुका म्हणे चोर । तो हा उभा कटिकर ॥३॥

अर्थ :
देवा जे या भक्तीमार्गाने गेले त्यांना तुम्ही निसंतान केले आहे. असा हा भक्तीमार्ग अवघड कठीण आहे पण आता हे कोणाला सांगावे ? आतापर्यंत या मार्गातील अनेक भक्तांना देवाने नागविले आहे त्यांच्याजवळ साधी लंगोटी देखील ठेवली नाही. तुकाराम महाराज म्हणतात, “तोच हा भक्तांचे सर्व काही चोरणारा चोर कटेवर कर ठेवून विटेवर उभा आहे. ”