1577.
अवघी च तीर्थे घडली एकवेळा । चंद्रभागा डोळा देखिलिया ॥१॥
अवघी च पापे गेली दिगंतरी । वैकुंठ पंढरी देखिलिया ॥धृपद॥
अवघिया संता एकवेळा भेटी । पुंडलीक दृष्टी देखिलिया ॥२॥
तुका म्हणे जन्मा आल्याचे सार्थक । विठ्ठलचि एक देखिलिया ॥३॥

अर्थ :
चंद्रभागा एक वेळा जरी डोळयाने पाहिली तरी जगातील सर्व तीर्थे घडल्याचे पुण्य घडते. पृथ्वीवरील वैकुंठ म्हणजे पंढरी व पंढरिला डोळयाने पाहिले की, सर्व पापे नष्ट होतात. एक वेळा पुंडलिकाला दृष्टीने पाहिले तर जगातील सर्व संतांची भेट झाल्यासारखेच आहे. तुकाराम महाराज म्हणतात, “एक वेळा विठ्ठलाला आत्मतत्वाने जर पाहिले तर जन्माला आल्याचे सार्थक होते. ”